Համաշխարհային հրեական կոնգրեսը Ամստերդամում համախմբել է ավելի քան 50 երկրների ազգային համայնքների տնօրեններին։
Հուլիսի սկզբին Ամստերդամում աշխարհի ավելի քան 50 երկրների ղեկավարներ և առաջատար մասնագետներ հավաքվել էին Համաշխարհային հրեական կոնգրեսի հրեական համայնքների տնօրենների 11-րդ ազգային ֆորումին (NCDF)։ Միջոցառումը նվիրված էր անդամ համայնքների միջև համագործակցության ամրապնդմանը և այսօր հրեական կյանքի առջև ծառացած փոփոխվող մարտահրավերների լուծմանը։
Հանդիպումը կազմակերպվել էր Համաշխարհային հրեական կոնգրեսի նիդերլանդական մասնաճյուղի՝ Նիդերլանդների հրեական համայնքների կազմակերպության (NIK) հետ համատեղ։ Ֆորումի քննարկումներն անցկացվում էին Չաթեմ Հաուսի կանոնի համաձայն (քննարկումների և հանդիպումների ժամանակ կիրառվող անանունության սկզբունք), ինչը մասնակիցներին հնարավորություն տվեց անկեղծորեն խոսել իրենց համայնքների առջև ծառացած խնդիրների մասին և ապահովեց լավագույն փորձի ու գործելակերպի գաղտնի փոխանակում։
Այս տարի քննարկումներն արտացոլեցին այն գնալով ավելի բարդ իրավիճակը, որում այսօր գործում են հրեական համայնքները։ Մասնակիցները քննարկեցին անվտանգության աճող խնդիրները, ամբողջ աշխարհում հրեական կյանքի առջև ծառացած քաղաքական և սոցիալական մարտահրավերները՝ հատուկ ուշադրություն դարձնելով հակասեմականության, բռնի ծայրահեղականության և համացանցում արմատականացման շարունակվող աճին, արհեստական բանականության զարգացմանը և ազգային կառավարությունների հետ հարաբերություններին։
Հայաստանի հրեական համայնքի նախագահ Ռիմմա Վարժապետյանը մասնակցել է այս հեղինակավոր ֆորումին։
Շնորհակալություն ֆորումին մասնակցելու համար
Ազգային տնօրենների 11-րդ ֆորումի ավարտից հետո Ռիմմա Վարժապետյանը կազմակերպիչներից ստացավ մասնակցության համար շնորհակալական նամակ։
Հարգելի Ռիմմա,
Շնորհակալություն ենք հայտնում Համաշխարհային հրեական կոնգրեսի հրեական համայնքների տնօրենների 11-րդ ազգային ֆորումին Ձեր մասնակցության համար, որը տեղի ունեցավ Ամստերդամում վերջին մի քանի օրերին։
Շատ ոգեշնչող էր գտնվել ավելի քան 50 երկրների հրեական համայնքների մասնագետների շրջապատում՝ կիսվելով փորձով, ռազմավարություններով, մարտահրավերներով և ցուցաբերելով փոխադարձ աջակցություն։
Հատուկ շնորհակալություն ենք հայտնում Նիդերլանդների հրեական համայնքների կազմակերպությանը (NIK), և հատկապես Ջիգալին և Ռուբենին՝ ջերմ հյուրընկալության և այս տարվա ֆորումի կազմակերպման գործում համագործակցության համար։
Անհամբեր սպասում ենք Ամստերդամում ձևավորված գաղափարներն ու կապերը զարգացնելու հնարավորությանը՝ շարունակելով համատեղ աշխատանքը ամբողջ աշխարհում հրեական կյանքի պաշտպանության, ամրապնդման և զարգացման ուղղությամբ։
Հրապարակվել է «Մագեն Դավիթ» թերթի № 7 (271) համարում, 2026 թ. հուլիս։