Չնայած Գազայի հատվածի շրջանում ռազմական գործողությունների շարունակմանը, կառավարությունը և արտակարգ ծառայությունները գործադրում են բոլոր ջանքերը՝ երկրի քաղաքացիների բնականոն կյանքն ապահովելու համար, որքան դա հնարավոր է անվտանգության նկատառումները հաշվի առնելով։ Այսօր Իսրայելի տարածքի մեծ մասում, Թիկունքի ծառայության (Պիկուդ հա-Օրեֆ) առաջարկությունների համաձայն, ծառայությունների և կյանքի ոլորտների մեծ մասը կարող է գործել սովորական ռեժիմով։ Թիկունքի ծառայության հրապարակած Իսրայելի քարտեզի վրա երևում է, որ երկրի մեծ մասը ներկված է կանաչ գույնով։
Երկրի կենտրոնում և Երուսաղեմում հանված են ուսումնական հաստատությունների, այդ թվում՝ դպրոցների և մանկապարտեզների աշխատանքի բոլոր սահմանափակումները։ Ինչ վերաբերում է երկրի հարավում և հյուսիսում դպրոցների և մանկապարտեզների աշխատանքին, ապա այնտեղ պարապմունքները նախկինի պես անցկացվելու են սահմանափակումներով։ Գազայի հետ սահմանին գտնվող բնակավայրերում, Արևմտյան Նեգևում և Աշքելոնում ուսումնական հաստատությունները փակ են, իսկ պարապմունքներն անցկացվում են հեռավար։ Անհրաժեշտ է պարզաբանել, որ հարավի բնակավայրերի մեծ մասից բնակիչների մեծ մասը տարհանվել է երկրի կենտրոն և Էյլաթ։ Աշդոդում, Գան Յավնեում, Բնեյ Այշում, Արևմտյան Լախիշում թույլատրվում է ուսումը պաշտպանված տարածքներում։ Թիկունքի ծառայության նմանատիպ կարգադրություններ գործում են հյուսիսի բնակավայրերում, այսինքն՝ Լիբանանի սահմանին գտնվող բնակավայրերում։
Իսրայելի առողջապահության նախարարությունը հայտնում է, որ ներկայումս երկրի հիվանդանոցներում բուժում են ստանում 278 մարդ, որոնք վիրավորվել կամ տուժել են ՀԱՄԱՍ-ի ահաբեկիչների ներխուժման սկզբից ի վեր։ Հիշեցնենք, որ ներխուժումից հետո առաջին օրերի ընթացքում Իսրայելի բժշկական հաստատություններ է ընդունվել ավելի քան 4800 տուժած։ Այս օրերին իսրայելական հիվանդանոցներն ու բժշկական հաստատությունները վերադառնում են բնականոն գործունեության, վերսկսվել են պլանային հետազոտություններն ու բուժական պրոցեդուրաները։
Երկրի կենտրոնում պատերազմի սկսվելուց մի քանի օր անց վերսկսեցին աշխատել հագուստի և կոշիկի, էլեկտրոնիկայի խանութները, գրախանութները, ինչպես նաև վարսավիրանոցները, կոսմետիկ սրահները, բացվել են բազմաթիվ սրճարաններ և ռեստորաններ։ Միևնույն ժամանակ, երկրի հարավի և հյուսիսի այն շրջաններում, որոնք հարում են Գազայի հատվածի սահմանին և Լիբանանի սահմանի մոտ գտնվող առճակատման գծին, առևտրային գործունեությունը և ծառայությունները զգալիորեն սահմանափակված են։ Այնտեղ մնացած բնակչությանը զգալի օգնություն են ցուցաբերում կամավորները՝ նրանց սննդամթերք և դեղորայք հասցնելով։
Պատերազմի առաջին օրերին իսրայելական թանգարանները հայտնեցին, որ, ժամանակավորապես դադարեցնելով այցելուների ընդունելությունը, կազմակերպում են վիրտուալ էքսկուրսիաներ, ինչպես նաև առցանց լուսավորչական գործունեություն։ Օրինակ, Իսրայելի թանգարանն առաջարկում է ամենօրյա դասախոսություններ և վեբինարներ երեխաների և մեծահասակների համար։ Այսօր թանգարանների մի մասն արդեն վերադարձել է սովորական աշխատանքի կամ բաց է կրճատ ժամանակացույցով։ Իր դռները բացեց ANU հրեա ժողովրդի թանգարանը՝ հայտարարելով, որ ներկայումս թանգարան այցելելն անվճար է։ Թել Ավիվի գեղարվեստի թանգարանը նախատեսում է վերսկսել իր աշխատանքը առաջիկա շաբաթ օրը։
Արտակարգ դրության պայմաններում առօրյան նկարագրելու համար, միաժամանակ սովորական կենսակերպը պահպանելու ձգտմամբ, ժամանակակից եբրայերենում օգտագործվում է «շիգրատ հերում» սահմանումը, այսինքն, մոտավորապես ասած՝ «արտակարգ իրավիճակի առօրյա»։ Այսօր երկրի բնակչության մեծ մասն ապրում և աշխատում է հենց այդպիսի նորմալացման ռեժիմում։
Աղբյուր՝ http://il4u.org.il/blog/about-israel/povsednevnaya-zhizn-izrailya-v-usloviyax-vojny
